د ملي دفاع وزارت چارواکي وايي چې لا هم د یاد وزارت اړوند ۶۰ چورلکې د افغانستان ګاونډيو هېوادونو کې دي او دوی ته نه دي سپارل شوي.
د یاد وزارت چارواکو دغه څرګندونې نن یکشنبه د زمري ۲۹مه «ملت ته د دولت حساب ورکولو پروګرام» کې د ملي دفاع وزارت د تېر کال کلني راپور وړاندې کولو پر مهال کړي دي.
د سلاموطندار پښتو فېسبوکپاڼه وڅارئ
د ملي دفاع وزارت د پلان او پالېسۍ معین محمدقاسم فرید دې ناسته کې وویل چې د سقوط پرمهال ګاونډیو هېوادونو ته لېږدول شوې شاوخوا ۶۰ چورلکې لا هم افغانستان ته نه دي سپارل شوي.
څه باندې دوه کاله مخکې هغه مهال چې هېواد کې جمهوریت راوپرځېد، د پوځ لسګونه چورلکې له یوشمېر پوځیانو سره ګاونډیو هېوادونو ته ولېږدول شوې.
د راپورونو له مخې، ازبکستان، تاجکستان، او ایران هغه ګاونډي هېوادونه دي چې د مخکیني نظام له نسکورېدو سره هممهاله چورلکې او نور پوځي وسایط او وسایط یادو هېوادونو ته لېږدول شوي دي.
که څه هم دغو هېوادونو د چورلکو په ګډون ځینې پوځي وسایط او وسایل بېرته افغان لوري ته سپارلي، خو لا هم لسګونه چورلکې او نور پوځي وسایل دغو هېوادونو کې پاتې دي.
په ورته مهال د ملي دفاع وزارت د پلان او پالېسۍ معین زیاته کړه چې دوی په وار وار له یادو هېوادونو د چورلکو د بېرته ورګرځولو غوښتنه کړې، خو په وینا یې، د امریکا تر فشار لاندې دي.
نوموړي وویل چې دغه وزارت سره پخواني افسران او مسلکي کسان کار کوي او د یوې نوې طرحې له مخې به یې راتلونکې کې د ترفع، تقاعد او دندو اړوند چارې روښانه شي.
د یاد وزارت چارواکو همداراز ملت ته د دولت د حساب ورکولو پروګرام کې وویل چې تېر یوه کال کې یې ۶۰۰ هغه محصلین پر دندو ګومارلي چې د یاد وزارت په چوکاټ کې له هېواده بهر د پوځي زدهکړو لپاره تللي وو.