د افغاني سرې میاشتې ټولنې مسوولانو په ۶ ولایتونو کې د اړمنو مېرمنو د ځواکمنولو لپاره د ۵۵ پروژو د پیل اعلان کړ.
د يادې ټولنې سکرټر جنرالې نیلاب مبارز نن کابل کې په يوه خبري ناسته کې وويل، د يادو پروژو په عملي کولو سره به مرستونونو کې له ۸۴۰ ډېرې مېرمنې په بېلابېلو برخو لکه خياطي، د سابون توليد، چرګانو، مالدارۍ او يو شمېر نورو برخو کې زدهکړې وکړي.
د مېرمنو د پياوړي کولو دغه پروژې په کابل، هرات، ننگرهار، بامیان، کندهار او بلخ ولايتونو کې عملي کېږي.
کابل کې د مرستونونو رييس محمدسلیم وردک د يادو پروژو عملي کول د هغو ښځو پياوړي کول ګڼي چې په طبيعي او غير طبيعي پېښو کې يې د کور سرپرستان له لاسه ورکړي او اوس مهال په مرستونونو کې دي.
دغه پروژې له ۲۴۷ زره ډالرو ډېر ارزښت لري چې پيسې يې د افغاني سرې میاشتې ټولنې له لوري ورکول کېږي.
د افغاني سرې میاشتې ټولنې مسوولان وايي، له دې پيسو هرې کورنۍ ته د پروژې د نوعيت اړوند د ۱۱۵ ډالرو تجهیزات پېرل او وېشل کېږي.
د دوی په وينا، دغه پروژې ۵ کالو لپاره دوام کوي.
