د بلخ ولایت ترکمن توکمه اوسېدونکيو نن په کابل کې د یوې اعتراضیه غونډې پر مهال د حکومت له نه پاملرنې شکایت وکړ او ويې ویل، د هېواد په شمالي ولایتونو کې د دغه قوم د ځوانانو وژل، د ماشومانو برمته نیول او ترې باج اخیستل په یوه دود بدل شوي او عادي کار ګرځېدلی دی.
معترضو ترکمنانو ټینګار وکړ چې د وسلهوالو زورواکو له خوا د دوی ګواښل او برمته نیول ورځ تر بلې په ډېرېدو دي.
ترکمن توکمو پر حکومت تور پورې کړ چې له دوی سره د شوي زور زیاتي د څېړلو لپاره هېڅ یوې حکومتي ادارې ګام نه دی پورته کړی.
د ترکمن قوم د پیوستون شورا غړي عبدالحمید مرادي د قومي پرېکړه لیک په لوستلو سره وویل چې د دوی د برمته نیونو، امنیت خوندي کولو، متوازنې پراختیا او دولتي ادارو کې د سیاسي ګډون دوسیې باید وڅېړل شي.
معترضانو خبرداری ورکړ چې که غوښتنې یې ونه منل شي، په پراخو مدني لاریونونو به لاس پورې کړي.
د ترکمنو قوم د یووالي شورا ریيس قربانمراد مراد د تښتونې پېښو په اړه وايي، د انسان تښتونو ورستیو پېښو په اړه تر اوسه پورې هېڅ ډول څېړنه نه ده شوې.
د بلخ ولایت ترکمن اوسېدونکي د خپلو ماشومانو د تښتونې په اړه داسې مهال نیوکه کوي چې ۹ کلن عبدالرووف له تېرو ۳۵ ورځو راهیسې د نامعلومو کسانو له خوا تښتول شوی دی.
ابراهیم هارون د عبدالرووف له خپلوانو څخه دی او وايي، د هغه په تښتولو سره د دې ماشوم کورنۍ هېڅ ډول روحي او جسمي ارامي نه لري.
خو د بلخ د والي ویاند منیر فرهاد سلاموطندار ته وايي، ټاکل شوې یو ګډ کشفي او امنیتي ټیم له مرکز څخه دې ولایت ته ورشي او د تښتول شوو کسانو په اړه خپلې څېړنې پیل کړي.
دې ورستیو کې په هېواد کې د ماشومانو تښتونې پېښې ډېرې شوي چې انسان تښتوونکي د هغوی په بدل کې پیسې غواړي.
د راپورونو له مخې بلخ ولایت کې تېره یوه میاشت کې دوه ماشومان او یو نارینه تښتول شوي دي.
