د لوګر امنیې قومنداني چارواکي وایي چې د تېرې یوې اوونۍ راهیسې د کابل-لوګر پر لویه لاره ټرافیکي پېښې دوه برابره شوې دي.
د یاد ولایت د امنیې قومنداني ویاند احمدالله انس سلاموطندار ته ویلي چې په تېره یوه اوونۍ کې د کابل-لوګر پر لویه لاره د موټرو ګڼې ګوڼې له امله پنځه کسان مړه شوي او دولس نور ټپيان دي.
نوموړي زیاته کړه چې دغه پېښې د وړو او لویو موټرو د ټکر او چپهکېدو له امله رامنځته شوي دي.
د نوموړي په وینا، د کابل-لوګر پر لویه لاره د ټرافیکي پېښو د زیاتېدو یوازینی لامل د کابل-کندهار لوې لارې د موټرو مسیر بدلون دی.
د کابل-کندهار لویې لارې د جوړېدو له امله یوشمېر موټر د لوګر له لارې کابل ته داخلېږي. له دې وړاندې به دغه موټر د میدانوردګ له لارې کابل ته تلل چې اوس پرې دې لارې د سړک رغونې چارې روانې دي.
د لوګر اوسېدونکي او موټرچلوونکي هم وایي چې دې وروستیو کې د کابل-لوګر پر لویه لاره ټرافیکي پېښې دوه برابره شوي او لامل یې هم د کابل-کندهار لوې لارې د موټرو مسیر بدلون او د کابل-لوګر لوې لارې په ترڅ کې د جګړو له امله د ویجاړو شویو پلچکونه بیارغول بولي.
سلاموطندار پر ټویټر هم وڅارئ
دوی وړاندیز کوي چې د کابل-لوګر پر لویه لاره د بار وړونکو موټرو وزن کنټرول کړي، ګنې په وینا یې، دغه لاره به نور هم ویجاړه شي.
