داعش ډلې د یوې خبرپاڼې په خپرولو سره د ایران د قدس سپاهپاسداران د پخواني قوماندان قاسم سلیماني د څلورم تلین پر مراسمو د پرون ورځې خونړيو بریدونو مسوولیت پر غاړه اخیستی دی.
دغې ډلې په یوه خبرپاڼه کې چې نن یې خپره کړې، لیکلي چې په یادو بریدونو کې ۳۰۰ کسانو ته مرګژوبله اوښتې ده. داعش ډلې ویلي چې یاد بریدونه د «عمر موحد» او «سیفالله مجاهد» له لوري شوي او په خبره یې، دوی خپل ځانمرګي واسکټونه د خلکو په منځ کې چاودلي دي.
دغه بریدونه د مرغومي په دیارلسمه، د چهارشنبې ورځ په مازدیګر هغه مهال وشول چې سلګونه کسان د ایران د کرمان په ګلزار شهدا کې د قاسم سلیماني د څلورم تلین نمانځلو لپاره را ټول شوي وو. د ایراني رسنیو د راپورونو له مخې، په یادو بریدونو کې ۱۰۳ کسان وژل شوي او ۱۴۱ نور ټپیان دي.
د ایران د کورنیو چارو وزیر احمد وحیدي ویلي چې لومړنی برید د ماسپښین درې بجې او دویم هم په ۰۳:۲۰ دقیقو هغه مهال شوی چې خلک د لومړي برید د ټپیانو پر ژغورلو لګیا وو.
دغه بریدونو له پراخو غبرګونونو سره مخامخ شوي دي. قاسم سلیماني څلور کاله وړاندې په عراق کې د امریکا د بېپیلوټه الوتکو له لوري په برید کې ووژل شو.
