د لوګر کرنې، اوبولګولو او مالدارۍ ریاست چارواکي وایي چې د کرنې او مالدارۍ وزارت له لوري د یوشمېر نړیوالو بنسټونو په همکاري په مرکز پلعلم او دوه ولسوالیو کې شاوخوا ۳۰۰ کسانو ته د شپږو میاشتو لپاره د کار زمینه برابره شوه.
د یاد ولایت د کرنې اوبولګولو او مالدارۍ ریاست د طبیعي سرچینو امر نصروالدین بهیج سلاموطندار ته وویل چې نارینو ته د کانالونو کېندنې او مېرمنو ته د چرګانو کوچنیو فارمونو جوړولو برخه کې د شاوخوا لس میلیونه افغانیو په ارزښت د کار زمینه برابره شوې.
د سلاموطندار پښتو فېسبوکپاڼه وڅارئ
بهیج زیاته کړه، په دغه پروژه کې شاوخوا ۳۰۰ نارینه او ښځينه ته په مرکز پلعلم، محمداغې او خروار ولسوالیو کې د کارکولو زمینه برابره شوې او هڅه روانه ده چې د دغه ولایت په پاتې ولسوالیو کې هم وزګارو کسانو ته کارکولو زمینه برابره کړي.
لوګر کې وزګارې مېرمنې او نارینه هم خوښ دي چې کرنې او مالدارۍ وزارت د یوشمېر نړیوالو بنسټونو په همکاري ورته د شپږو میاشتو لپاره د کارکولو زمینه برابره کړې، خو ټینګار کوي چې حکومت دې وزګارو کسان ته په دوامداره توګه د کارکولو زمینه برابره کړې.