د سرپرست حکومت د ټرانسپورټ او هوايي چلن وزارت د هواپېژندنې ریاست نن په یوه خبرپاڼه کې ویلي چې په ۲۸ ولایتونو کې به سخت باران وشي او له کبله به یې سېلابونه هم راووځي.
د دغه ریاست په وینا، یاد باران به سبا یکشنبه د سالنګونو په ګډون، په بدخشان، تخار، کندوز، بلخ، سمنګان، بغلان، نورستان، کونړ، لغمان، ننګرهار، پروان، پنجشېر، کاپیسا، کابل، میدان وردګ، لوګر، پکتیا، خوست، پکتیکا، غزني، دایکندي، بامیان، سرپل، زابل، روزګان، کندهار، هلمند او غور ولایتونو کې وشي.
د هواپېژندنې ریاست په بېلابېلو برخو کې د باران کچه له ۱۵ تر ۵۰ ملي مټرو پورې اټکل کړې ده.
یاد ریاست په شمالي، شماللوېدیځو، سوېلي، لوېدیځو، سوېللوېدیځو او مرکزي ولایتونو کې د سخت باد لګېدو اټکل هم کړی دی.
د یادونې ده چې یوشمېر ولایتونه په وروستیو څو ورځو کې د سختو بارانونو او سېلابونو راوتلو شاهدان وو.
