د نیمروز محلي مسوولان وايي چې بېګاه (د لیندۍ اتهویشتمه، د سهشنبې ورځ) شاوخوا یوولس بجې د دغه ولایت د دلارام ولسوالي پر لویې لارې څلور موټر یو له بل سره ټکر شوي دي.
د سلاموطندار پښتو فېسبوکپاڼه وڅارئ
د نیمروز د ټرافیکو مدیریت د ټرافیکي پېښو مدیر سردارمحمد رحیمي سلاموطندار ته ویلي چې یاده پېښه د زرنج-دلارام پر لویې لارې په «منار» سیمه کې هغه مهال شوې چې دوه ۴۰۴ او ۵۸۰ ډوله موټر او دوه هم د خاور موسسې موټر پر یو وخت یو له بل سره ټکر شوي دي.
د نوموړي په وینا، په دې پېښه کې درې کسانو خپل ژوند له لاسه ورکړی او ۴۳ نور ټپیان شوي دي. هغه وايي، خلکو د پېښې ټپیان بېلابېلو ولایتونو ته لېږدولي او روغتیايي وضعیت یې هم د ډاډ وړ ښودل شوی دی.
د موټروانانو بېغوري او ګړندی تګ او د سړکونو خرابوالی هغه لاملونه دي چې تل یې په هېواد کې د ګڼشمېرو کسانو ژوند اخیستی یا یې هم ټپیان کړي دي.
