د افغانستان لومړنۍ جنراله او پخوانۍ د روغتیا وزیره سهیلا صدیق د پلازمېنې کابل په سردار محمد داود خان روغتون کې د ورپېښې ناروغۍ له کبله نن د جمعې په ورځ مړه شوه.
سهیلا صدیق له نږدې شپږو کلونو راهیسې د الزایمر په ناروغۍ اخته او سردار محمد داود خان روغتون کې یې درملنه کېده.
د افغانستان روغتیا وزیر محمد جواد عثماني د نوموړې مړینه د افغانستان لپاره نه جبرانېدونکې ضایعه بولي او ويې ويل: « پخوانۍ د روغتیا وزیرې پوهاندې سهیلا صدیق د خپلو خلکو د ژغورنې لپاره ریښتونی او مخلص کار وکړ او نن سهار سرادر محمد داود خان روغتون کې مړه شوه.»
ولسمشر محمد اشرف غني او د افغانستان د ملي مصالحې رييس عبدالله عبدالله هم د سهیلا صدیق په مړینه خواشیني ښودلې ده.
سهیلا صدیق نږدې څلوېښت کاله د روغتیا برخه کې کار کړی او د سردار محمد خان روغتون مشره او روغتیا وزیره پاتې شوې ده.
خواله رسنیو کې هم د سهیلا صدیق په مړینه خواشیني ښودل شوې او د نورو افغان مېرمنو لپاره بېلګه بلل شوې ده.