د ترکیې ولسمشر رجیب طیب اردوغان د «ټسلا موټرو» جوړولو کمپنۍ له خاوند اېلن ماسک څخه غوښتنه کړې چې دغه هېواد کې دې د یادې کمپنۍ یوه څانګه پرانیزي.
د ترکیې دولتي اژانس انادولو پرون یکشنبه د سپټمبر ۱۷مه پر اېکس شبکه «ټوېټرپاڼه» لیکلي چې اردوغان له اېلن ماسک دغه غوښتنه نیویارک کې د یوې غونډې پر مهال کړې ده.
د سلاموطندار پښتو فېسبوکپاڼه وڅارئ
د ترکیې ولسمشر رجیب طیب اردوغان د ملګروملتونو د ۷۸مې کلنۍ غونډه کې د ګډون په موخه د امریکا نیویارک ښار ته تللی دی.
تراوسه د ټسلا کمپنۍ خاوند او امریکا کې د ترکیې سفارت د ولسمشر رجب طیب اردوغان دې غوښتنې ته په سمدستي توګه څه نه دي ویلي.
د ټسلا کمپنۍ مالک اېلن ماسک د روان کال په مې میاشت کې ویلي و چې د یادې کمپنۍ د یوې نوې څانګې د پرانېستلو لپاره د ځای په لټه کې دی.
ټسلا د روان ۲۰۲۳ کال په اګسټ میاشت کې د خپلو ارزان بیه برښنايي موټرو د تولید یوه کمپنۍ هند کې جوړه کړه. د موټرو جوړولو ټسلا کمپنۍ دا مهال نړۍ کې شپږ څانګې لري او ټاکل شوې چې خپله اوومه څانګه په مکسیکو کې پرانیزي.
د برښنايي موټرو جوړولو دې کمپنۍ د روانې اوونۍ د شنبې پر ورځ اعلان وکړ چې روان کال یې ترې دې مهاله څه باندې پنځه میلیونه موټر پلورلې دي.