په ترکیه او سوریه کې د روانې اوونۍ د دوشنبې ورځې زلزلې له کبله د مړو شویو کسانو شمېر ۱۱۲۲۴ ته لوړ شوی دی. په دواړو هېوادونو کې لا هم د کنډوالو او خاورو لاندې د ايسارو کسانو د ژغورنې عملیات روان دي.
د ترکیې ولسمشر رجب طیب اردوغان نن زلزله ځپلو سیمو څخه د لیدنې پر مهال دغه هېواد کې د مړو شویو او ټپیانو وروستۍ شمېرې په ډاګه کړې.
نوموړي خبریالانو ته وویل چې تراوسه په دغه هېواد کې د شوې زلزلې له امله ۸۷۵۴ کسانو خپل ژوند له لاسه ورکړی او ۴۹۱۳۳ کسان بیا ټپیان شوي دي. په سوریه کې بیا تراوسه د ۲۴۷۰ کسانو د مړینې خبر ورکړل شوی دی.
په ورته مهال یوشمېر نړیوالو رسنیو راپور ورکړی چې زلزله ځپلو سیمو کې د خلکو د ژغورنې عملیات روان دي او ښايي د مړینې شمېرې له دې هم لوړې شي.
د راپورونو پر بنسټ په ځینو سیمو کې سړې هوا تر خاورو او کنډوالو لاندې د ایسارو کسانو د ژغورنې عملیات له خنډ سره مخ کړي دي. په همدې حال کې د روغتیا نړیوال سازمان خبرداری ورکړی چې د یادې زلزلې له امله د مړو شویو کسان شمېر ښايي له ۲۰۰۰۰ واوړي.
زلزله ځپلو سره د مرستو په لړ کې ګڼشمېر هېوادونو خپلې مرستې اعلان کړي چې د بهرنیو چارو وزارت هم پرون ترکیه او سوریه کې زلزله ځپلو سره نغدي مرستې وکړې.
سلاموطندار پر ټویټر هم وڅارئ
د بهرنیو چارو وزارت په یوې خبرپاڼه کې راغلي چې د اسلامي امارت حکومت د ترکیې زلزله ځپلو سره لس میلیونه افغانۍ او د سوریې زلزله ځپلو سره پنځه میلیونه افغانۍ مرسته اعلان کړې ده.
