د افغانستان د دعوت او ارشاد ادارې رییس محمدهاشم ورور وايي چې خبریالان دې ږیرې پرېږدي او د تصویر اخیستل لویه ګناه ده.
نوموړي دغه څرګندونې نن سهشنبه کب لومړۍ نېټه کابل کې د مبلغینو لپاره تربیتي اصلاحي سیمنار کې د وینا پر مهال کړې دي.
د سلاموطندار پښتو فېسبوکپاڼه وڅارئ
نوموړي ویلي: «موږ د رسنیو استازیو ته بلنه «دعوت» ورکوو چې ږیرې پرېږدي او خپل وخت دې په تصویر اخیستلو نه ضایع کوي، تصویر اخیستل لویه ګناه ده، موږ له الله غواړو چې خدای دې تاسو ته حلاله روزي درکړي.»
نوموړی دغه څرګندونې داسې مهال کوي چې څو ورځې وړاندې د کندهار والي په یوه مکتوب د دغه ولایت له ټولو مسوولانو غوښتنه کړې وه چې د ژوندیو موجوداتو له تصویر او ویډیو اخیستلو ډډه وکړي.
هغه دې مکتوب کې ویلي: «د کندهار ولایت مقام د دغه ولایت ټولو مسوولانو او ادارو ته لارښوونه کړې چې په راتلونکي کې د ژوندیو موجوداتو له تصویر او ویډیو اخیستو څخه ډډه وکړي؛ ځکه دغه کار له ګټې نه ډېر زیان لري.»
د افغانستان د خبريالانو اتحاديې مسوولان په کندهار کې د ژوندیو موجوداتو د تصویر او ویډیو پر اخيستو لګېدلي بنديز اندېښمن کړي او ویلي یې دي چې دغه کار به خبريالانو ته په سرخوږي بدل شي.
دوی د اسلامي امارت له چارواکو غواړي چې اطلاعاتو ته د لاسرسي لپاره د ټولیزو رسنیو قانون تصویب کړي.
د افغانستان د خبريالانو اتحاديې رییس حفيظالله بارکزی وايي: «د ژوندیو موجوداتو د تصویر او ویډیو پر اخیستو بندیز په راتلونکي کې د رسنیو کار له ستونزو سره مخامخ کوي او هغه ستونزې چې اوس شته، د پالیسي نه لرلو له کبله دي. سرپرست حکومت باید اطلاعاتو ته د لاسرسي په موخه د ټولیزو رسنیو قانون تصویب کړي.»
بلخوا دې سیمنار کې د پوهنې وزارت مسوولان وايي چې د نبوي اخلاقو پر بنسټ د دعوت چارې مخته وړل به د نظام د پایښت لامل شي.
د پوهنې وزارت سرپرست حبیبالله اغا وویل چې د دعوت پر مهال باید مبلغان ځانونه د خلکو واکمنان ونهګڼي. «یوه ستره دنده راکړل شوې چې دعوت وکړو او هغه ډول دعوت وکړو چې پیغمبر کړې او د دعوت پرمهال د واکمن تصویر ونهکړو. کله دعوت کوو، نو باید ځانونه د هغوی واکمنان ونهګڼو.»
د مبلغانو تربیتي اصلاحي یو ورځنی سیمنار د پوهنې وزارت له لوري په کابل کې جوړ شوی و چې ۲۲۰ مبلغو پهکې ګډون کړی وو.