د دایکندي د ټولګټو چارو ریاست مسوولان وايي چې د دایکندي-بامیان لویه لاره د سختو واورو اورېدو او توپان له کبله تړل شوې ده.
د سلاموطندار پښتو فېسبوکپاڼه وڅارئ
د دایکندي د ټولګټو چارو رییس لعلمحمد یوسفي سلاموطندار ته ویلي چې د دایکندي د میرامور او د بامیان د ورس ولسوالي ترمنځ د قوناق کنډو نن ماسپښین تړل شوی دی. دغه کنډو دایکندي له بامیان او بیا کابل سره نښلوي.
نوموړی وايي، د سپرلۍ یو موټر په یاد کنډو کې بند دی او د ټولګټو چارو ریاست د واورو پاکولو ډله د یادې لارې د پرانېستلو لپاره هڅې کوي، خو په خبره یې، د سختو واورو اورېدو او توپان راتلو یې کار سخت کړی دی.
په بامیان کې ځايي سرچینې وايي چې نه یوازې «قوناق» کنډو، بلکې د «شاتو» کنډو چې دایکندي ولایت او د بامیان ورس او پنجاب ولسوالۍ د بامیان له مرکز سره نښلوي، هم له پرون راهیسې تړل شوی دی.
بلهخوا د بامیان د ټولګټو چارو ریاست هم د یوې خبرپاڼې په خپرولو سره منلې چې د دغه ولایت د ورس او پنجاب ولسوالیو لویې لارې او هم د بامیان-دایکندي ترمنځ لویه لاره تړل شوې ده.
په خبرپاڼه کې لیکل شوي چې د دغه ریاست د واورو پاکولو ډله هڅه کوي، څو ژرترژره یادې لارې پاکې او پرانېزي.
