نړیوال بانک یوه تازه راپور کې ویلي، د نړیوالو مرستو کمېدو سره سره، د افغانستان اقتصاد په تدریجي ډول د ښه کېدو په حال کې دی.
راپور کې ویل شوي چې د ۲۰۲۴ او ۲۰۲۵ مالي کال پر مهال د افغانستان اقتصاد ۲.۵ سلنې وده کړې ده.
نړیوال بانک دا راپور نن چهارشنبه د اپرېل ۲۳مه خپور کړی او په کې یادونه شوې چې اقتصادي وده د هېواد د وګړو د ودې له کچې ټیټه ده.
همداراز، راپور کې د ۲۰۲۵ او ۲۰۲۶ مالي کال لپاره د اقتصادي ودې کچه ۲.۲ سلنې اټکل شوې ده.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د نړیوال بانک راپور کې زیاته شوې چې بېوزلي او د خوړو ناامني لاهم جدي ننګونې دي.
د جنوبي اسیا لپاره د نړیوال بانک مرستیال مارټین ریزر ویلي، سیمه اصلاحاتو ته اړتیا لري چې کارونه پکې پیدا شي او اقتصادي وده پکې چټکه شي.
د اسلامي امارت مسوولانو تردامهال د نړیوال بانک د دغه راپور پر وړاندې غبرګون نه دی څرګند کړی.
د یادونې ده چې نړیوال بانک تر دې وړاندې یوه راپور کې ویلي و چې د مالي انزوا، بشري سرچینو کمښت او سیاسي بې ثباتۍ له امله د افغانستان اقتصاد له ماتېدونکي وضعیت سره مخامخ دی.
