په افغانستان کې د ملګرو ملتونو سیاسي استازولي (یوناما) د اسلامي امارت هغې پرېکړې ته تند غبرګون ښودلی چې له مخې یې په دغه هېواد کې په غیردولتي موسسو کې د ښځو پر کار بندیز لګولی دی.
یوناما د اسلامي امارت د یادې پرېکړې په اړه اندېښنه ښودلې او هغه یې د ښځو د حیاتي نقش له پامه لوېدل بللې ده.
د افغانستان لپاره د ملګرو ملتونو د سرمنشي د ځانګړې استازې مرستیال رامز الاکبروف شنبه شپه د مرغومي درېیمه پر خپله ټوېټرپاڼه د اسلامي امارت دې پرېکړې ته ژوره اندېښنه ښودلې ده.
الاکبروف ویلي چې په نادولتي کورنیو او بهرنیو موسسو کې د ښځو پر کار بندیز د ښځو د ژوند په هره برخه کې د دوی د حیاتي حقونو ښکاره نقض دی.
دا په داسې مهال دی چې بېګاه ناوخته د اقتصاد وزارت د یوه مکتوب په خپرولو سره په نادولي کورنیو او بهرنیو موسسو کې د ښځو پر کار بندیز ولګاوه.
په دغه مکتوب کې راغلي چې په نادولتي کورنیو او بهرنیو موسسو کې د ښځو له لوري د حجاب نه مراعت او د اسلامي امارت د قوانینو او مقرراتو د نه پام له امله جدي شکایتونه شوي دي.
د اقتصاد وزارت دغه مکتوب کې زیاته کړې چې د خپل مسوولیت ترسره کولو په موخه ټولو غیردولتي کورنیو او بهرنیو موسسو ته لارښوونه کوي چې تر بلې خبرتیا پورې دې د ښځینه کارکوونکو دندې وځنډوي.
دغه وزارت خبرداری ورکړی چې د دغه امر د ځنډولو په صورت کې به د موسسې جواز لغوه کېږي.
سلاموطندار پر ټویټر هم وڅارئ
د اسلامي امارت له لوري په نادولتي موسسو کې د ښځو پر کار د بندیز پرېکړه له ګڼو کورنیو او بهرنیو غبرګونونو سره مخ شوې ده.
