نوموتی شاعر او لیکوال عبدالله ستوری نن «دوشنبه، سلواغې ۳۰مه» کندهار کې د زړه حملې له امله مړ شوی دی.
ستوری د کندهار په ادبي ډګر کي ډېره فعاله او پېژندل شوې څېره وه چې د خپل ادبي فعالیت او خدمت په ترڅ کي يې ۲۱ ځله جایزې او ستاینلیکونه هم ترلاسه کړي وو.
د سلاموطندار پښتو فېسبوکپاڼه وڅارئ
د کندهار د اطلاعاتو او فرهنګ ریاست د هنر او فرهنګ امر عبدالشکور څپاند، د عبدﷲ ستوري مړینه تایید کړه او د نوموړي مړینه یې د کندهار فرهنګي هڅو لپاره یوه ستره او نه جبرانېدونکې تشه وبلله.
عبدالله ستوری د مولوي عبدالحکیم زوی او د حاجي عبدالکریم لمسی دی چې په ۱۳۵۳کال د کندهار ښار اتمه ناحیه (عباس اباد) کي زېږېدلی و. له نوموړي پنځه لوڼې او درې زامن پاتې دي.
ستوری اته لیکلي اثار لري چي «جار تر محمد سمه، د نعتونو ټولګه، ته د ستوري تصور کې شعري ټولګه، بیا به نرۍ جامې ونهکړم_ادبي صنایع، ګل لپه_شعري ټولګه، د ارغند په لمن کې _د کندهار شاعرانو تذکره، د کندهار د هنرمندانو تذکره، د کندهار د ممثلینو تذکره او د کندهار د سپورټي اتلانو تذکره،» یې ناچاپه اثار پاتې دي.
