د کرنې، اوبولګولو او مالدارۍ وزارت لهخوا نن «چهارشنبه، مرغومې ۱۳مه» کابل کې د ۳۰زره امریکايي ډالرو په لګښت جوړه شوې د دولتي مسلخونو د غوښې پلور نمایندګي پرانېستله.
د یادې نمایندګي د پرانېستلو په اړه جوړو شویو مراسمو ته د کرنې، اوبولګولو او مالدارۍ وزارت د دفتر رییس وویل، خصوصي سکتور ژمنه کړې چې د مسلخونو برخه کې به ۵۰ میلیونه ډالره پانګونه وکړي او په وینا یې، د دولتي مسلخونو د غوښې پلور نمایندګي پرانیسته یې یوه برخه ده.
د کرنې وزارت د دفتر رییس خورشید احمد وویل، د دولتي مسلخونو د غوښې پلورلو نمایندګي کولای شي چې ۲۴ ساعتونو کې پېرېدونکو ته ۱۰ ټُنه غوښه وړاندې کړي.
هغه وویل: «د څارویو حلالولو یا مسلخونو برخه کې یې ۵۰ میلیونه ډالره پانګونه کړې او د دولتي مسلخونو د غوښې پلور د څو نمایندګيو جوړول یې هم یوه برخه ده او د دې نمایندګي پر جوړېدو ۳۰زره ډالره لګښت راغلی دی.»
په ورته وخت کې یوشمېر هېوادوال وايي، تر دې وروسته کولای شي دغو نمایندګیو څخه په ښه کیفیت غوښه وپېري. د کابل اوسېدونکي شېراحمد وویل: «ښهوالی یې دا دی چې غوښه یې صحي او پاکه ده، ښه ځای کې حلالېږي او خلکو ته وړاندې کېږي.»
د کرنې، اوبو لګولو او مالدارۍ وزارت د مسوولانو په وینا، دامهال کابل کې دوه دولتي مسلخونه فعالیت کوي چې ډېر ژر به د ښار په کچه څو نور مسلخونه هم جوړ شي.