د کندهار مسوولان وايي چې په دغه ولایت کې د یوې راډیو کارکوونکي نصیراحمد میرزايي ځان وژلی دی. نصیراحمد میرزايي نن یکشنبه ځان په مرمۍ ویشتی او وژلی دی.
د کندهار د والي ویاند حاجي زید سلاموطندار ته ویلي چې یاد کس د کورنیو ستونزو له کبله ځان وژلی دی.
په کندهار کې ځایي سرچینې بیا وايي چې نصیراحمد یوه میاشت مخکې خبریالانو ته د وزګارتیا شکایت هم کړی و.
دا داسې مهال ده چې تر دې مخکې هم یوشمېر کسانو په بېلابېلو ولایتونو کې د کورنیو او اقتصادي ستونزو له کبله ځانونه وژلي دي.
