د بامیان امنیتي مسوولان وايي چې د دغه ولایت په مرکز «بامیان ښار» کې یوه ۱۳کلن هلک ځانوژنه کړې ده.
د بامیان د والي ویاند فرزان سیغاني سلاموطندار ته ویلي چې پېښه پرون شنبه د غبرګولي ۱۳مه د بامیانو ښار اړوند «زرګران» سیمه کې رامنځته شوې ده.
د سلاموطندار پښتو فېسبوکپاڼه وڅارئ
هغه د یادې ځانوژنې د لاملونو او انګېزې په اړه څه نه دي ویلي، خو یوې محلي سرچینې بیا سلاموطندار ته ویلي، نوموړي هلک د خپلې کورنۍ غړیو سره تر لفظي شخړې وروسته ځانوژنه کړې ده.
دغه هلک داسې مهال ځانوژنه کوي چې تېره ورځ په روزګان کې هم یوه کس ځانوژنه کړې وه چې د یاد ولایت مسوولانو یې لامل نهو په ګوته کړی.
که څه هم د ډېری ځانوژنو پېښو لامل نه وي روښانه، خو مسوولان بیا د ځینو پېښو لاملونه، روغتیايي ستونزې او کورنی تاوتریخوالی یادوي.
