د روسیې ولسمشر ولادیمیر پوتین د شمالي کوریا مشر کېم جونګ اون په رسمي بلنه د دغه هېود پلازمېنې پیونګ یانګ ته رسېدلی دی.
پوتین په ۲۴ کلونو کې دغه هېواد ته د خپل لومړي سفر په ترڅ کې د چهارشنبې پر ورځ له غرمې مخکې دغه ښار ته ورسېد.
د سلاموطندار پښتو فېسبوکپاڼه وڅارئ
کیم د پوتین ښه راغلاست لپاره په هوايي ډګر کې و او دواړه مشران په یو لوی موټر کې د کمسوسن ایالت مېلمستون ته یوځای سفر وکړ. دا لیدنه د کېم په بلنه ده او د روسیې په ختیځ کې د وستوچني کاسموډروم کې د تېر سپټمبر په میاشت کې د دواړو مشرانو ترمنځ د سړو خبرو-اترو تعقیب دی.
د شمالي کوریا مشر پوتین سره د خبرو پرمهال په اوکراین کې د روسیې د جګړې لپاره د “بشپړ ملاتړ او پیوستون” ژمنه وکړه.
ولسمشر ولادیمیر پوتین په پیونګ یانګ کې د خبرو پرمهال وویل چې مسکو د امریکا او د هغې د متحدینو د لسیزو اوږدې “استبدادي او امپریالیستي پالیسي” په وړاندې جګړه کوي.
پوتین په اوکراین کې د کېم د ملاتړ له امله مننه وکړه او وویل چې دواړه هېوادونه به د خپل شراکت پراختیا لپاره یو تړون لاسلیک کړي.
روسیې او شماليکوریا د ۲۰۲۲ کال په فبرورۍ کې له هغه وروسته چې مسکو د اوکراین پر خاوره خپل بشپړ برید پیل کړ، خپلې اړیکې ژورې کړې دي.