په افغانستان کې له اوږدې وچکالۍ وروسته سږنی پسرلی له ډېرو بارانونو سره پیل شوی دی. دغه اورښتونه چې په تېره میاشت کې پیل شوي، نن او سبا یې هم د هېواد په لږترلږه ۲۲ ولایتونو کې د اورېدو اټکل شوی دی. دغو بارانونو د غنمو په حاصلاتو کې چې د افغانستان مهم کرنیز محصول دی، د زیاتوالي هیلې را ټوکولې دي.
د سلاموطندار پښتو فېسبوکپاڼه وڅارئ
که څه هم د کرنې، اوبو لګولو او مالدارۍ وزارت په هېواد کې د هغو ځمکو کچه نهده ښودلې چې غنم پرې کرل شوي، خو وايي، سږ کال د ډېرو اورښتونو او د پام وړ للمي کښتونو ته د اوبو رسېدلو له امله به د غنمو په حاصلاتو کې د پام وړ زياتوالى راشي.
د کرنې وزارت ویاند مصباحالدین مستعین سلاموطندار ته ویلي: «وروستي اورښتونه د حاصلاتو په زیاتوالي کې ښه رول لري. دا چې غنم تر ډېره للمي کرل کېږي، دا هیلهمندي شته چې سږ کال د غنو حاصلات د پام وړ زیات شي.»
په همدې حال کې د هرات کروندګر هم د غنمو له کروندو څخه د ښو حاصلاتو را ټولولو هیله لري. یو کروندګر حاجي بسمالله وايي، تېر کال یې د وچکالۍ له امله له کښتونو ښه حاصلات ترلاسه نه کړل، خو په خبره یې، که ږلۍ یې ونه وهي، سږ کال بارانونه شوي او د دوی هیلې یې هم را ټوکولې دي.
په روان پسرلي کې د اورښتونو د زیاتوالي له خوشبینۍ سره سره داسې اندېښنې هم شته چې د وچ ژمي له امله په ډېری کروندو کې کښتونه نهدي کرل شوي .
د اوبو او چاپېریال ساتنې برخې کارپوه نجیبالله صدیق سلاموطندار ته ویلي: «له بده مرغه د کښتونو یوه برخه د سړې هوا او سېلابونو له کبله زیانمن شوي. په تېر ژمي کې د مني کښتونه د تودوخې او وچې هوا له کبله زیانمن شول. سره له دې چې د سږ کال شرایط ښه دي، خو ډېرې سیمې له کښتونو پاتې دي؛ ځکه خلکو په مني کې کښتونه کړي وو او له منځه ولاړل.
بلهخوا د ملګرو ملتونو د خوړو او کرنې سازمان په هېواد کې د غنمو د حاصلاتو د سروې بهیر پیل کړی دی. د دې ادارې د خبرپاڼې له مخې چې پرون خپره شوه، یاده پروسه په ننګرهار ولايت کې پيل شوې او په ټول هېواد کې به پلې شي. د مسوولانو په خبره، د دې سروې موخه د افغانستان د غنمو حاصلاتو او کيفيت معلومول دي.
