د کابل په سټالف ولسوالي کې د اته میلیونه امریکايي ډالرو په ارزښت د «ممیزو د پروسس» یوې کارخونې په فعالیت پیل وکړ.
د ریاستالوزراء اقتصادي مرستیال ملا عبدالغني برادر اخوند د دې کارخونې د فعالیت پيل د کرنیزو محصولاتو د ارزښت لوړولو په برخه کې مهم ګام یاد کړی دی.
د نوموړي په وینا، د یادې کارخونې د فعالیت پیلېدو سره به د سیمې اقتصاد په حرکت راشي، صادرات به معیاري بڼه غوره کړي او سلګونو هېوادوالو ته به د کار زمینه هم برابره شي.
دغه کارخونه د ملا عبدالغني برادر او نورو چارواکو له لوري نن چهارشنبه، زمري اتمه د کابل په سټالف ولسوالي کې پرانېستل شوې ده.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
ریاستالوزرا په دې اړه پر خپله اېکسپاڼه لیکلي: «اسلامي امارت د سیمې او نړۍ هېوادونو ته د کرنیزو محصولاتو د صادراتو لپاره اسانتیاوې رامنځته کړې دي، دغو محصولاتو ته یې د بازارموندنې په موخه نندارتونونه جوړ کړي او پر هغو وارداتو یې تعرفې لوړې کړې، چې په کور دننه تولیدېږي.»
د سمون د ممیزو د پروسس کارخونه پر ۱۲۸ جریبه ځمکه جوړه شوې چې اته میلیونه ډالر پانګونه پکې شوې او په کلني ډول د ۱۰زره ټُنه ممیزو د پروسس وړتیا لري.
همداراز د یادې کارخونې له لوري پروسس او بستهبندي شوي ممیز به روسیې، سعودي عربستان، متحده عربي اماراتو، هند، کاناډا، امریکا، برېټانیا او د ختیځې اسیا هېوادونو ته صادر شي.
