د فلسطین روغتیا وزارت مسوولان وايي چې د غزې د الشفا روغتون کې د تېرو ۴۸ ساعتونو پر مهال د برښنا نشتون او اسراییلي ځواکونو چاپو له امله ۲۴ ناروغانو خپل ژوند له لاسه ورکړی دی.
الجزیرې خبري شبکې نن شنبه د نومبر ۱۸مه د یاد روغتون د رییس محمدابو سلمیا له قوله راپور ورکړی چې ۲۲ ناروغان یوازې په یوه شپه کې مړه شوې دي.
د تېرې اوونۍ د چهارشنبې ورځې راهیسې یاد روغتیايي مرکز د اسراییلي ځواکونو لهخوا کلابند شوی او روغتون ته ټولې غځېدلې لارې تړل شوې دي.
روغتون کې د برښنا نشتون له کبله ټولې حیاتي چارې په ټپه درېدلې دي. اسراییل ادعا کوي چې د یاد روغتون لاندې د حماس ډلې غړي پټ ځایونه لري او له دې ځایه د تونلونو له لارې پر اسراییلي ځواکونو بریدونه کوي.
خو حماس ډلې او د الشفا روغتون چارواکي بیا اسراییلو دغه ادعا بېبنسټه بللې او رد کړې یې ده.
سلاموطندار پر ټویټر هم وڅارئ
د فلسطین روغتیا وزارت ویلي چې پر الشفا روغتون د اسراییلو برید د یاد روغتون ډېری تاسیسات ویجاړ کړي دي.