د پاکستان د پنجاب په چکوال ښار کې د واده د ورا موټر د چپهکېدو له امله د ښځو او ماشومانو په ګډون ۱۴ کسان مړه شوي او ۶۴ نور ټپیان دي.
پاکستاني رسنیو نن «دوشنبه د کب لومړۍ» راپور ورکړی چې پېښه یکشنبه شپه رامنځته شوې او ټپیان روغتون ته لېږدول شوي دي.
رسنیو د چکوال کمیسارۍ مرستیال قره العین مالک له قوله ویلي چې دغه بس موټر له اسلاماباد څخه لاهور ته روان و او د لارې په اوږدو کې یې بریکونو کار پرېښی او له کنټرول څخه وتلی دی.
د نوموړي په وینا، د بس موټر ترڅنګ درې نور موټر هم کندې ته لوېدلي او یاده مرګژوبله یې رامنځته کړې ده. د راپورونو پر بنسټ، په دغه پېښه کې د موټر چلوونکي په ګډون شپږ ښځې هم مړې شوې دي.
دا د وروستیو دوو میاشتو پر مهال څلورمه مرګونې ټرافیکي پېښه ده چې پاکستان کې رامنځته کېږي.
سلاموطندار پر ټویټر هم وڅارئ
پاکستان کې مسوولان د سړکونو او موټرونو خرابوالی، ګړندی تګ او د موټر چلوونکو بېاحتیاطي دغه هېواد کې د ټرافیکي پېښو له لاملونو یادوي.
