ناپېژنده وسلهوالو چې پر موټرسایکل سپاره وو، نن سهار د کندهار ښار په دویمه ناحیه کې یو څارنوال وژلی دی.
دغه څارنوال محمد نبي نومېږي او له کور نه دندې ته د تګ پر مهال وژل شوی دی.
یوه امنیتي سرچینه د نوم نه ښودلو په شرط دا پېښه تاییدوي او وايي، وژل شوی کس ملکي څارنوال و.
تر اوسه د دغه برید مسوولیت کوم چا یا وسلهوالې ډلې پر غاړه نه دی اخیستی.
دا په داسې حال کې ده چې یوه میاشت وړاندې په کندهار کې د استیناف څارنوالي مخکینی مسوول شبیراحمد قیومي هم ناڅرګندو وسلهوالو ترور کړی و.
