د ولسمشر لومړی مرستیال امرالله صالح وايي چې کابل ښار کې به له ۱۰۰ میلیونه ډېرو امریکايي ډالرو په ارزښت امنیتي کمرې ولګول شي.
نوموړي نن پر خپلې فېسبوکپاڼې لیکلي چې د دغو کمرو د لګولو پروګرام د افغان دولت د متحدانو د غوڅ ملاتړ په مرسته عملي کېږي.
هغه ټینګار کړی چې په دغه کار سره به کابل ښار د ترهګرو او غلو د فعالیت سیمه نوره هم تنګه شي.
د نوموړي په وینا، کابل ښار کې په وروستي ځل په ۲۰۰۸ کال کې امنیتي کمرې لګول شوې وې.
دا په داسې حال کې ده چې په وروستیو څو میاشتو کې په پلازمېنه کې ترهګريزې او جنايي پېښې د پام وړ ډېرې شوي او د خلکو ډېرې اندېښنې یې را پورته کړې دي.
