د ناټو سرمنشي ینس سټولټنبرګ د امریکا د ولسمشر ډونالډ ټرمپ خبرو په غبرګون کې وايي، امریکا باید له افغانستانه د خپلو ځواکونو د وتو په تړاو دې تړون سره مشوره وکړي.
نوموړي دا څرګندونې تېره ورځ په يوه خبري ناسته کې د ناټو په مرکز بروکسل کې کړې دي.
ینس سټولټنبرګ وویل، افغانستان ته د تګ پرېکړه په ګډه شوې او د راتلونکو بدلونونو په اړه به هم پرېکړه په ګډه کوي.
نوموړی وايي، افغانستان کې د ځواکونو موجوديت او اوږدمهاله امنیت د ناټو د غړيو هېوادونو په ګټه دی.
د ناټو د سرمنشي په خبره، ناټو ځواکونه د سپټمبر یوولسمې بریدونو ته د ځواب لپاره افغانستان ته تللي او ځکه اوس هم هلته دي چې بیا دغه هېواد د ترهګرو په مرکز بدل نهشي.
نوموړي همداراز وويل چې ناټو د سولې له پروسې او د بينالافغاني خبرو له پیله ملاتړ کوي.
د ینس سټولټنبرګ دا خبرې له هغه وروسته دي چې د امریکا ولسمشر ډونالډ ټرمپ تېره ورځ وویل، له راتلونکي کرسمس مخکې به له افغانستانه ځواکونه وباسي.
افغان حکومت تر اوسه پورې د ډونالډ ټرمپ د څرګندونو په اړه څه نه دي ويلي؛ خو د ملي مصالحې عالي شورا رييس عبدالله عبدالله ویلي، له افغانستان د امریکایي ځواکونو وتل شرایطو پورې تړاو لري، نو هر ډول بېړنی ګام ناوړه پایلې درلودلی شي.
طالبانو تېره ورځ د يوې اعلاميې په خپرولو سره د ټرمپ له دې پرېکړې هرکلی کړی او دا يې د شوې هوکړې عملي کېدو برخه کې مثبت ګام بللی دی.