اسلامی امارت تشقی ایشلر وزیرلیگی نینگ اعلام قیلیشیچه، ایرته “چهارشنبه” تشقی وزیرلیگی سرپرستی امیرخان متقی بیر هیات باشلیغی‌ده اسلام‌آباد گه سفر قیله‌دی.
اسلامی امارت تشقی ایشلر وزیرلیگی سوزلاوچی‌سی عبدالقهار بلخی نینگ توییتر صحیفه‌سیده یازیشیچه، اوشبو وزارت سرپرستی امیرخان متقی ایرته “چهارشنبه” یوقاری مرتبه‌لی بیر هیات باشلیغی ده پاکستان باشکنتی اسلام‌آباد گه سفر قیله‌دی. بلخی نینگ ایتیشیچه، اوشبو هیات نینگ پاکستان رسمی‌لری بیلن اقتصادی رابطه‌لر کوچلنتیریلیشی، ترانزیت و باش پناه‌ایزلاوچی‌لر توغریسیده بحث قیلیشی ممکن.
اوشبو سفر ده ایکی مملکت یشاوچیلری نینگ اوتیب- قیتیش‌لری خصوصیده قولایلیک یره‌تیلیشی حقیده هم صحبت قیلینیشی ممکن. ایتیلیشیچه، مالیه و سوداگرلیک وزیرلری هم اوشبو هیات‌گه شامل دیر.
افغانستانده اسلامی امارت حاکم بولگنیدن سونگ، بو بیرینچی مرته که اسلامی امارت رسمی بیر هیاتی پاکستان گه سفر قیله‌دی. سونگی پیت‌لرده پاکستان طالبان تحریکی، اسلامی امارت ایچکی ایشلر وزیرلیگی سرپرستی سراج‌الدین حقانی میانجی‌گرلیگی آرقه‌لی خوست ولایتیده پاکستان دولتی بیلن مذاکره قیلگن بیرحالده، اوشبو سفر صورت تاپه‌دی.
