مملکتده اوروش‌لر باعث، یوزلرچه عایله اوی و جای‌لرینی ترک قیلیب و بوتون بارلیکلرینی قولدن بیرگن‌لر.
آنه‌لر و آته‌لر باله‌لری نینگ تنه‌سیگه بولگن یالغیز کییم‌لری بیلن اوق و آتیشمه آستیدن چیقیب کابل شهری گه‌قدر کیلگنلر.
اوروش‌لر سبب، آواره بولگنلر حاضرده کابل پارکلری و آچیق فضالریده یمان بیر وضعیتده حیات کیچیره‌دیلر و تیریک‌چیلیک قیلیش اوچون چادرلری و ییگولیک ماده‌لری یوق دیر.
بیزلرنینگ فیسبوک صحیفه‌میزگه باش اورینگ!
آواره بولگن‌لرنینگ کوپراغی تخار، بغلان و قندوز ولایت‌لری نینگ یشاوچی‌لری دیر. اولرنینگ ایتیش‌لریچه، ۳ کون آلدین کابل‌گه کیلگنلر آذیق-آوقات‌لری و سوولری یوق دیر و حاضرگه‌قدر حکومت تامانیدن هیچ‌قنده‌ی یاردم صورت تاپمه‌گن.
آواره‌لر جمله‌سیدن موسا، شمسیه و قمرنسا نینگ ایتیشیچه، باره‌دیگن جای‌لری یوق دیر و اولردن بیرقطاری مناسب جای و ییگولیک ماده بولمه‌گنی باعث، کسل بولگنلر.
آواره بولگنلر نماینده‌لری نینگ ایتیش‌لریچه، تخار، بغلان و قندوز ولایتلریدن مینگلرچه عایله آواره بولیب کابل‌گه کیلگنلر. اولرنینگ ایتیش‌لریچه، آواره بولگن‌لردن بیرقطاری اقارب‌لری نینگ اوی‌لریگه حیات کیچیره‌دیلر و باشقه بیرقطاری ایسه یمان وضعیتده آچیق فضا ده تیریک‌چیلیک قیله‌دیلر.
سرای شمالی منطقه‌سی نینگ آزادی پارکی‌ده جایلشگن آواره‌لرنینگ نماینده‌سی مبارز همدرد نینگ ایتیشیچه، باش‌پناه یوق‌لیگی باعث، یوزلرچه عایله پارک‌لر و بیابان‌لرده حیات کیچیره‌دیلر.
جناب همدرد نینگ ایتیشیچه، حاضرگه‌قدر حکومت تامانیدن هیچ‌قنده‌ی یاردم صورت تاپمه‌گن و بیرقطار سوو و ییگولیک ماده سوداگرلر و دولتی بولمه‌گن موسسه‌لر تامانیدن توزیع قیلینگن.
عین‌حالده، مهاجرلر و باش‌پناه ایزلاوچی‌لر وزیرلیگی مسوول‌لری نینگ ایتیش‌لریچه، دستلبکی آمارلرگه کوره، تخار، بغلان، قندوز و بدخشان ولایتلریدن ۱۷ مینگ عایله آواره بولیب کابل‌گه کیلگن و اولرنینگ بیللی رقمی‌نی معلوم قیلیش اوچون تیکشیریش‌لرنی دوامی بار.
مهاجرلر و باش‌پناه ایزلاوچی‌لر وزیرلیگی اورین باسری رضا باهر نینگ ایتیشیچه، آواره بولگن‌لرگه یاردم بیریش اوچون اضطراری کمیته ایجاد ایتیلگن و کمپ توزه‌تیش اوچون ایش‌لرنی دوامی بار.
جمهورلیک ریاستی بیرینچی اورین باسری امرالله صالح نینگ فیسبوک صحیفه‌سیده یازیشیچه، آواره‌لر وضعیت‌لریگه ییریشش اوچون سعی و حرکت‌لرنی دوامی بار.
بیزلرنینگ توییترده تعقیب قیلینگ!
مهاجرلر و باش‌پناه ایزلاوچی‌لر وزیرلیگی تامانیدن بیریلگن آمارلرگه کوره، مملکتده اوروش‌لر سبب، حاضرگه‌قدر ۵۷ مینگ عایله آواره بولگن.
