ایران معلوم شرطلر اساسیده باییتیلگن یورانیومنی روسیه گه تاپشیریش گه راضی بولگن. ییتکرمهلرنینگ معلوماتیگه کوره، تهران یدراو (هسته) دستورینی تولیق توگهتیش اورنیگه اونی اوزاق مدت گه توختهتیشگه راضی بولگن.
معلوماتلر اساسیده، ایران تخمیناً ۴۰۰ کیلوگرام یوقاری باییتیلگن یورانیومنی امریکا قوشمه ایالتلریگه ایمس، بلکی روسیه گه تاپشیریش گه قرار قیلگن.
ایران، اوروش دوامیده ییتکزیلگن ضرر اوچون امریکادن تاوان تولش طلبیدن هم واز کیچیشی ممکن. شو بیلن بیرگه، تهران واشنگتندن اقتصادی امتیازلر آلیشگه اینتیلماقده.
شونینگدیک، ایران، هرمز بوغوزینی باسقیچمه-باسقیچ آچیشنی تکلیف قیلگن. اوشبو ریجه اساسیده، پاکستان و عمان ضامن تامانلر اولهراق احتمالی ماجرالرنی ترتیب گه سالیشده اشتراک ایتهدی.
ایراننینگ باییتیلگن یورانیومدن واز کیچیشی واشنگتننینگ تهران گه قویگن اساسی طلبلریدن بیری حسابلنهدی. روسیه تشقی ایشلر وزیری سرگئی لاوروف اپریل آییده مسکو «باییتیلگن یورانیوم مسئلهسینی حل قیلیشده اوز رولینی اوینشگه تیار» ایکنینی بیلدیرگندی.
ایسلهتیب اوتهمیز، امریکا قوشمه ایالتلری جمهور باشلیغی دونالد ترامپ ایران گه بوگون (۲۹ ثور/۱۹ می، سهشنبه) ریجهلشتیریلگن حربی هجومنی کیچیکتیرگنینی معلوم قیلگن ایدی. ترامپنینگ ایتیشیچه، هجومدن واز کیچیشنی اوندن قطر امیری شیخ تمیم بن حمد آل ثانی، سعودی عربستان ولیعهدی و باش وزیری محمد بن سلمان آل سعود همده بیرلشگن عرب امیرلیگی باشلیغی شیخ محمد بن زاید آل نهیان سورهگن.
