د هرات د حوزوي روغتون مسوولان وايي چې دغه ولایت کې د نن یکشنبې «تلې ۲۳مه» زلزلو له امله تر دې مهاله دغه روغتون ته دوه جسدونه او ۱۲۵ ټپیان وروړل شوې دي.
د امریکا ځمکپېژندنې سروې د معلوماتو له مخې، نن په هرات کې د یوه ساعت په ترڅ کې دوه زورورې زلزلې وشوې چې د مالي او ځاني زیانونو د اوښتو خبر هم ورکړل شوی دی.
د سلاموطندار پښتو فېسبوکپاڼه وڅارئ
لومړۍ زلزله چې نن سهار شاوخوا ۸ بجې شوې مرکز یې د یاد ولایت د کُشک ولسوالي کاریزنو سیمه ښودل شوې ده. د ریښتر په کچه د یادې زلزلې شدت ۶،۳ ښودل شوی دی.
ویل کېږي چې لا تراوسه د یاد ولایت په ځینو لرو پرتو ولسوالیو کې د شوې زلزلې له امله ټپیان حوزوي روغتون ته نهدي لېږدول شوي.
مسوولانو د یادې زلزلې له امله د مرګژوبلې شمېرو د لوړېدو اندېښنه ښودلې ده.
د امریکا ځمکپېژندنې سروې پر خپله اېکس ټولنیزه شبکه «ټوېټرپاڼه» همداراز لیکلي، دویمې زلزلې د هرات ښار شمال لوېدیځې سیمې لړزولې دي.
دویمه زلزله چې د ریښتر په کچه ۵،۵ درجې ښودل شوې، د هرات ښار شمال لوېدیځ ته په ۲۹ کیلومټرۍ کې تر ځمکې لاندې شاوخوا ۱۲کیلومټره ژوره وه.
ویل کېږي چې په فراه او بادغیس ولایتونو کې هم د یادې زلزلې ټکانونه محسوس شوي دي.
