د عربي متحده اماراتو د بهرنیو چارو وزارت ویلي چې د ملګروملتونو امنیت شورا به سبا جمعه د سلواغې اوومه د افغانستان د وضعیت په اړه ناسته جوړه کړي.
دغه وزارت زیاته کړې، یاده ناسته د فرانسې، جاپان او عربي متحده اماراتو په غوښتنه سبا ترسره کېږي.
د عربي متحده اماراتو د بهرنیو چارو وزارت ویلي: «د یادې ناستې اهمیت او سیمه کې روان وضعیت ته په کتو، د ملګروملتونو د سرمنشي د مرستیال د نظریاتو د اورېدو لپاره یوه غیرعلني او اغېزمنه جلسه ده.»
دغه وزارت ټينګار کړی چې په یاده ناسته کې به د ملګروملتونو د سرمنشي مرستیاله امنه محمد د اسلامي امارت له چارواکو د خپلې لیدنو په اړه معلومات شریک کړي او د ملګروملتونو د امنیت شورا غړیو ته د افغانستان د وضعیت ارزونې په اړه خپل نظر څرګند کړي.
سلاموطندار پر ټوېټرپاڼه هم وڅارئ
د ملګروملتونو امنیت شورا داسې مهال د افغانستان وضعیت په اړه ناسته کوي چې لا هم دغه هېواد کې پر نجونو او ښځو د اسلامي امارت محدودیتونه پر خپل ځای پاتې دي.