د سرپرست حکومت د کورنیو چارو وزارت په شخصي موټرو کې د دولتي نښو او هارنونو پر کارولو بندیز لګولی دی.
دغه وزارت نن پنجشنبه د کب ۱۷مه پر اېکسپاڼه لیکلي د شخصي موټرو له چلوونکو غوښتنه کړې چې په خپلو موټرو کې د دولتي نښو، اشارو او هارنونو له لګولو ډډه وکړي.
د سلاموطندار پښتو فېسبوکپاڼه وڅارئ
یاد وزارت لیکلي: «د ا.ا د مشرتابه عالي مقام د (۱۵۲۰) ګڼه فرمان پر بنسټ او د کورنیو چارو وزارت د مشرتابه د هدایت له مخې، د شخصي موټرونو خاوندانو ته خبر ورکول کېږي چې په شخصي وسایطو کې د دولتي هارنونو، اشارو او نورو دولتي نښو، لګولو څخه ډډه وکړي.»
خبرتیا!
د اسلامي امارت د مشرتابه عالي مقام د (۱۵۲۰) ګڼه فرمان پر بنسټ او د کورنیو چارو وزارت د مشرتابه د هدایت له مخې دشخصي موټرونو خاوندانو ته خبر ورکول کيږي چې په شخصي وسایطو کې د دولتي هارنونو، اشارو او نورو دولتي نښو دلګولو څخه ډډه وکړي.
له سر غړونکو سره به قانوني چلند کيږي. pic.twitter.com/ewLFiR9bVf— Ministry of Interior Affairs- Afghanistan (@moiafghanistan) March 7, 2024
د سرپرست حکومت د کورنیو چارو وزارت همداراز ټينګار کړی چې سرغړونکو سره به قانوني چلن کېږي.
د کابل په ګډون د هېواد په ګڼشمېر ولایتونو کې د شخصي موټرو ترڅنګ، موټرسایکلونو او نورو وسایطو کې خلک لوړ هارنونه چې دولتي بلل کېږي، کاروي چې ډېری کله خلکو ته سرخوږی جوړوي او د غږیزې ککړتیا لامل کېږي.