د بهرنیو چارو وزارت د فلسطین په جنین ښار کې د اسراییلي ځواکونو برید په کلکو ټکو غندلی دی. په دغه برید کې نهه فلسطینیان وژل شوي دي.
د بهرنیو چارو وزارت نن جمعه د سلواغې اوومه په یوې خبرپاڼه کې یاد برید غندلی او هغه یې وحشیانه عمل بللی دی.
په ورته مهال په خبرپاڼه کې پر نړیوالې ټولنې غږ شوی چې د فلسطینیانو حقونه خوندي او د اسراییل لهخوا د بشرضد جنایتونو پر وړاندې خپل غږ پورته او په اړه یې اقدامات وکړي.
بلخوا د فلسطین د روغتیا وزارت ویلي چې په وژل شویو کې یوه ۶۱ کلنه مېرمن هم شامله ده. دغه وزارت همداراز اعلان کړی چې د اسراییلو ځواکونو په دې برید کې ۲۰ کسان ټپیان شوي هم دي.
په همدې حال کې رسنیو ویلي چې وژل شویو کې د فلسطین د جهادي ډلو غړي او ملکیان هم شامل دي.
جنین ښار کې د اسراييلي رژیم عسکرو د وحشيانه بريد په تړاو د بهرنيو چارو وزارت څرګندونې pic.twitter.com/olAcv0rBzy
— Ministry of Foreign Affairs – Afghanistan (@MoFA_Afg) January 27, 2023
د رسنیو د راپورونو له مخې، د اسراییلو له دغه برید وروسته بېګاه فلسطیني وسلهوالو د غزې له تړانګې څخه د اسراییلو پر لور راکېټونه توغولي چې د اسراییلو د توغندیو د دفاعي سېسټم لهخوا شنډ کړل شوي دي.
سلاموطندار پر ټوېټرپاڼه هم وڅارئ
اسراییلو ځواکونو هم د یادو توغندیو په غبرګون کې پر فلسطین هوايي بریدونه کړي، خو له امله یې د مرګژوبلې سمدستي راپور نه دی ورکړل شوی.
