د هېواد په بېلابېلو برخو کې د مرموزو وژنو په دوام، په وروستیو ورځو کې رسنیو داسې ډېر راپورونه خپاره کړي چې د جنايي جرمونو پېښې انعکاسوي او ناپېژنده وسلهوالو پهکې ملکیان او د تېر حکومت نظامیان موخه ګرځولي دي.
په رسنیو کې د خپرو شویو راپورونو پر بنسټ، د وروستۍ یوې میاشتې پر مهال په ټول هېواد کې ۳۱ جنايي پېښې شوي چې اته یې د تېرې میاشتې په لومړۍ نیمايي او ۲۳ یې په دویمه نیمايي کې ثبت شوي دي.
ورورستۍ ۲۳ پېښې د سلواغې له ۲۴مې د کب تر اوومې رامنځته شوي چې دوه برابره لوړوالی ښيي.
د غزني اوسېدونکي دغه ولایت کې د جنايي پېښو له زیاتېدو شکایت کوي او اسلامي امارت څخه د امنیت د ټینګښت غوښتنه کوي.
بریالی چې د غزني اوسېدونکی دی، سلاموطندار ته وايي چې نږدې یوه میاشت مخکې وسلهوالو غلو یې زوی وژلی دی. نوموړی زیاتوي چې غلو یې د زوی جسد د غزني ښار څخه لرې یوې سیمه کې غورځولی و.
د کورنیو چارو وزارت مسوولان وايي، د روان کال د تلې مياشتې له پیله تر اوسه (په تېرو دوه نیمو میاشتو کې) په ټول هېواد کې لږ تر لږه ۲۱۰۰ جنايي پېښې شوي چې له ډلې يې ۱۶۲۵ پېښې کشف شوي دي.
د لوګر یوشمېر اوسېدونکو سلاموطندار ته ویلي چې په دې وروستیو کې د جنايي پېښو کچه لوړه شوې او هره اوونۍ دغه ولایت کې ګڼې جنايي پېښې ثبتېږي.
د بامیان ولایت محلي مسوولان وايي، پرون د شکیلا په نوم یوې پېغلې د دغه ولایت د ورس ولسوالي د «خاک بابه» په کلي کې د خپل کور په اشپزخانه کې ځان ځندۍ کړی دی. په ورته مهال د دایکندي محلي رسنیو راپور ورکړی چې دوه ورځې وړاندې د دغه ولایت د سنګتخت او بندر ولسوالي د «دهن غارک» کلي کې یوه ۲۰کلنه نجلۍ وژل شوې ده.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
