د کانونو او پټرولیم وزارت سرپرست وايي چې له دې وروسته به ماشومان د هېواد په کانونو کې کار نه کوي او له سرغړونکو سره به قانوني چلن کېږي.
د کانونو او پټرولیم وزارت سرپرست شهابالدین دلاور دغه څرګندونې نن یکشنبه د غبرګولي ۱۴مه بغلان ته د خپل سفر پر مهال کړي دي.
د سلاموطندار پښتو فېسبوکپاڼه وڅارئ
شهابالدین دلاور د هېواد په کانونو کې کارګرو ماشومانو ته په اشارې سره ویلي چې له دې وروسته به هېڅ ماشوم په کان کې کار نه کوي او که کارګر ماشوم لیدل کېږي، د کان کار به ودرول شي او سرغړونکو ته به جزا ورکول کېږي.
د کانونو او پټرولیم وزارت سرپرست بغلان ته د خپل سفر په ترڅ کې دغه ولایت کې د ډبرو سکرو د معیاري استخراج په موخه ۱۴ خصوصي کانونو ته د نهو میاشتو لپاره د کار کولو اجازهلیکونه وېشلي دي.
د نوموړي په وینا، له دې وروسته به د ډبرو سکرو د استخراج چارې په معیاري او د پرمختللو تجهیزاتو پر مټ مخته وړل کېږي.
د کانونو او پټرولیم وزارت سرپرست ټينګار کوي چې دا مهال څه باندې ۱۰زره کسان د هېواد په کانونو کې پر کار بوخت دي. ټاکل شوې چې دغه شمېر هېواد کې د نورو کانونو په استخراج او د بنسټییزو پروژو او ابادۍ کارونو کې څو برابره لوړ شي.
