د خوست د عامې روغتيا رياست چارواکي وايي چې د ياد ولايت په ملکي روغتون کې يې د افغانستان «توبرکلوز ملي پروګرام» د کنترول ریاست له لوري د «مقاوم توبرکلوز» ناروغانو د درملنې لپاره ځانګړې څانګه پرانیستله.
د یاد ولایت د عامې روغتیا ریاست مرستیال ډاکټر شېراګل ځدراڼ سلاموطندار ته وايي چې د «مقاوم توبرکلوز» څانګې په پرانیستو سره به ناروغانو ته ګڼې اسانتیاوې رامنځته شي او د خوست ملکي روغتون کې به د دوی تشخیص او درملنه کېږي.
د سلاموطندار پښتو فېسبوکپاڼه وڅارئ
نوموړي وويل:«مخکې زموږ د خوست مریضان به د مقاوم توبرکلوز د تشخیص لپاره پکتیا ته تلل او په لار کې له مختلفو حوادثو سره مخ کیدل، نن موږ وکولای شو چې، دلته د خوست په تخصصي شفاخانه کې د دې خدمات فعاله شي.»
د افغانستان د توبرکلوز ملي پروګرام د کنترول ریاست مسوول ډاکټر خانمحمد منګل بيا وویل چې خوست کې دامهال شاوخوا ۸۰ کسان په مقاوم توبرکلوز اخته دي. هغه له خلکو غوښتنه کوي چې د دې ناروغي مخنیوي او وړیا درملنې لپاره دې یاد مرکز ته مراجعه وکړي.
هغه وویل: «د خوست غریب خلک به وکولای شي چې د مقاوم توبرکلوز ناروغان چې مخکې پکتیا ته تلل، اوس به انشاءالله د خوست ولایتي روغتون کې تداوي کېږي او دلته به ټول د مقاوم توبرکلوز تشخیصیه تداوي او ټول پروسېجرونه تطبیق کېږي.»
بل لور یوشمېر هغه کسان چې د مقاوم توبرکلوز څانګې ته یې خپل ناروغان د درملنې لپاره راوړي، خوښ دي او وايي، اوس به په اسانۍ په لنډ وخت کې خپل ناروغان یاد مرکز ته د درملنې لپاره راوړي.
د افغانستان د توبرکلوز د ملي پروګرام د کنترول ریاست د معلوماتو له مخې، په ټول هېواد کې تراوسه شاوخوا دوه نیم زره د مقاوم توبرکلوز ناروغان تشخیص شوي دي.