د میدانوردګ د کرنې او مالدارۍ ریاست چارواکي وایي چې د ملګروملتونو د پراختیايي پروګرام په مالي ملاتړ د دغه ولایت ۶۵ بېوزله کورنیو ته د چرګانو کوچني فارمونه جوړېږي.
د یاد ولایت د کرنې او مالدارۍ ریاست مرستیال اصفالله اسدي سلاموطندار ته وویل چې دغه کوچني فارمونه په میدانښار، نرخ، جلرېز، چک، دایمیرداد او مرکزي بهسودو ولسوالیو کې د بېوزله کورنیو اقتصادي ودې لپاره جوړېږي.
د سلاموطندار پښتو فېسبوکپاڼه وڅارئ
اسدي زیاته کړه چې هرې کورنۍ ته ۳۰ د هګیو چرګې او د چرګانو د ساتنې او پالنې وسایل وېشل شوي او په پام کې ده چې ورته د چرګانو کوچني فارمونه د دغه ولایت په پاتې ولسوالیو او کلیو کې هم جوړ شي.
د میدانوردګ بېوزله او اړې کورنۍ هم خوښې دې چې د ملګروملتونو پراختیايي ادارې له لوري ورته د چرګانو ساتنې کوچني فارمونه جوړېږي، خو دوي ټینګار کوي چې کرنې او مالدارۍ ریاست دې بېوزله کورنیو ته د چرګانو ساتنې او پالنې په اړه عامه پوهاوی هم ورکړي.