د اسټرالیا په کوربهتوب د روان ۲۰۲۲ کال کرېکټ شل اووره نړیوال جام سیالیو په لړ کې نن د هند کرېکټ ملي لوبډلې په یوې په زړهپورې سیالۍ کې د بنګلدېش لوبډلې ته د پنځو منډو په توپیر ماته ورکړه.
د هند کرېکټ ملي لوبډلې په دغه سیالي کې لومړی توپوهنه وکړه او د ویرات کوهلي او کېل راهول د نیمه سلیزو پر مټ یې وکولای شوای چې په ټاکل شویو شلو اورونو کې د شږو لوبغاړو په سوځېدو ۱۸۴ منډې جوړې کړي.
د هند لپاره ویرات کوهلي ناسوخېدلې ۶۴ او کېل راهول ۵۰ منډې وکړې. بلخوا د بنګلدېش کرېکټ ملي لوبډلې بهترینه لوبه وکړه، خو باران یې دغه لوبه خرابه کړه.
د بنګلدېش لوبډلې له باران وړاندې په اوو اورونو کې ۶۶ منډې جوړې کړې او کوم لوبغاړی یې نه سوځېدلی، خو وروسته لوبه د باران له کبله ۱۶ اورونو ته راښکته شوه او هدف ۱۵۱ منډې وټاکل شو.
سلاموطندار پر ټویټر هم وڅارئ
بنګلدېش په ۱۶ اورونو کې د شپږو لوبغاړو په سوځېدو یوازې ۱۴۵ منډې جوړې کړې او دغه لوبه یې د پنځو منډو په توپیر وبایلله.