میانمار کې پوځ نن سهار د دغه هېواد د ولسواکۍ ملي ټولنې رهبرې انګسان سوچي پر ضد کودتا کړې ده او د نوموړې په ګډون يې د حکومت مهم لوړ پوړي چارواکي نيولي دي.
د میانمار پوځ چې مخکې یې په تېرو ټاکنو کې د پراخه ټاکنيزو درغلیو تورونو څېړلو غوښتنه کړې وه، په میانمار کې يې پر حاکم دولت کودتا کړې او د ملکي چارواکيو په نیولو سره يې په دې هېواد کې د اضطراري حالت په اعلان سره واک ترلاسه کړ.
د پوځ له لوري په يوه ويډيويي پيغام کې ويل شوي، د دغه هېواد واک د یو کال لپاره لوی درستیز مېنانګ هلاینګ ته لېږدول شوی دی.
مخابراتي شبکې او انټرنټ له ستونزو سره مخ دي او د ميانمار د رسمي رسنيو پروګرامونه هم بند شوي دي.
د ولسواکۍ ملي ټولنې حزب وياند هم دغه پېښه تاييد کړې او رويټرز ته يې ويلي چې دی به هم ډېر ژر ونيول شي.
پوځ د نومبر ټاکنې نيمګړې بولي او له ولسواکۍ ملي ټولنې یې غوښتل چې نوی حکومت جوړ نه کړي.
د میانمار د پوځ سره متحدې ډلې د ټاکنو پایلې وننګولې او د میانمار پوځ څو اوونیو لپاره ادعا کړې وه چې په ټاکنو کې پراخه درغلي شوې او ۸.۶ ميليونه درغلي يې پيدا کړې ده.
