د ګلبدين حکمتيار په مشرۍ د حزب اسلامي يو شمېر پلويانو نن سهار په کابل کې لاريون وکړ. دغه حزب ادعا کوي چې حکومت ورسره پر شوې هوکړه عمل نه دی کړی او د دوی بندیان لا هم د دولت په زندانونو کې دي.
د حزب اسلامي مشر ګلبدین حکمتیار تېره ورځ په کابل کې د یوې خبري غونډې پر مهال وويل، د حکومت پر ضد په کابل او یو شمېر نورو ولایتونو کې پراخ لاریونونه وکړي.
حکمتیار ويلي و، حکومت د یاد ګوند غوښتو پر بنسټ چې باید له بندخونو څخه د دغه ګوند بندیان خوشې کړي او حکومت باید ژر تر ژره استعفا ورکړي پاملرنه نه ده کړې.
د حزب اسلامي مشر ګلبدین حکمتیار د حکومت له لوري د نوموړي غوښتنو ته په نه پاملرنې نیوکه وکړه او ويې ويل، په داسې حال کې چې په تېرو لاریونونو کې د اوسني حکومت استعفا او د موقت حکومت د رامنځته کېدو غوښتنه شوې وه؛ خو بیا هم حکومت دغو غوښتنو ته پاملرنه نه ده کړې.
نوموړي ويلي و، حزب اسلامي پر حکومت د فشار راوړلو په موخه سر له جمعې ورځې په کابل او یو شمېر نورو ولایتونو کې پراخ لاریونونه پیلوي.
حکمتیار همداراز ويلي و چې د نن ورځې په لاريون کې به وسلې هم له ځانه سره ولري.
دا دویم ځل دی چې د حزب اسلامي ګوند له لوري په کابل او یو شمېر نورو ولایتونو کې لاریونونه کېږي. د تېر کال حوت مياشتې په ۱۵مه نېټه هم د دغه ګوند له لوري په کابل کې لاریون ترسره شوی و. د دغه لاریون ګډونوالو، ولسمشرۍ ماڼۍ د حکومت سولې او حزب اسلامي هوکړې په سرغړونه تورن کړی و.
ګلبدین حکمتیار تر دې وړاندې حکومت ته لس ورځې وخت ورکړی و چې د حزب اسلامي بندیان خوشې او د کډوالو د بېرته را ستنېدو لپاره یې اسانتیاوې برابرې کړي.
دغه حزب ادعا کوي چې حکومت ورسره پر شوې هوکړه عمل نه دی کړی او د دوی ۳ زره بندیان يې نه دي خوشې کړي.
