د میدانوردګ د عامې روغتیا ریاست مسوولان وایي چې تازه د عامې روغتیا وزارت له لوري د دغه ولایت په لروپرتو څلور ولسوالیو کې د ناروغانو پر مخ څلور روغتیايي مرکزونه پرانېستل کېږي.
د میدانوردګ د عامې روغتیا رییس زرک ځېرک سلاموطندار ته وویل چې دغه څلور مرکزونه به په نرخ، جلرېز، دایمیرداد او جغتو ولسوالیو کې فعاله شي.
نوموړي زیاته کړه چې یاد روغتیايي مرکزونه به د ولسوالي په کچه ناروغانو او ناروغلرونکو ته معیاري خدمات وړاندې کوي.
د نوموړي په وینا، دوه کاله وړاندې میدانوردګ کې ۷۷ روغتیایي مرکزونه د ناروغانو او ناروغلرونکو پر مخ پرانېستل شوي وو چې اوس یې شمېر ۱۱۰ ته لوړ شوی دی.
سلاموطندار پر ټویټر هم وڅارئ
د یادې ولسوالي اوسېدونکي هم خوښ دي چې سیمو کې یې روغتیايي مرکزونه پرانېستل کېږي، خو ټینګار کوي چې له روغتونونو او روغتیايي مرکزونو باید څارنه وشي، ناروغانو او ناروغلرونکو ته معیاري خدمات وړاندې شي.