بلخ کې یو شمېر سوداګرو د پانګوالو لپاره د لا ډېرو اسانتیاوو په رامنځ ته کولو ټینګار وکړ.
دغو سوداګرو نن (چهارشنبه، قوس ۲۶) بلخ کې د سوداګرۍ او پانګونې خونې د نوي مشر ټاکلو غونډې پرمهال وویل، د ویزې ترلاسه کولو کې ستونزې او د مالیاتو او د برښنا لګښتونو راکمول د دوی پر وړاندې اصلي ننګونې دي.
دې سره، د بلخ د سوداګرۍ او پانګونې خونې نوي مشر محمدابراهیم غضنفر د سوداګرو د ستونزو د حل او د هغوی لپاره د لا ډېرو اسانتیاوو رامنځته کولو ډاډ ورکړ او وې ویل، هېواد کې د پانګونې لپاره مناسب چاپېریال برابر شوی.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
ښاغلي غضنفر بهر کې له مېشتو افغان سوداګرو غوښتنه وکړه چې خپله پانګه هېواد ته را ولېږدوي او د ځوانانو لپاره د کارموندنې زمینه برابره کړي.
د بلخ ولایت د سوداګرۍ او پانګونې خونې مشر زیاته کړه چې هڅه کوي د افغان سوداګرو او د سیمې هېوادونو ترمنځ سوداګري او اقتصادي اړیکې وده کړي.
د هغه په وینا، د اقتصادي اړیکو پراختیا کولی شي د هېواد په وده او پرمختګ کې اغېزمن تمام شي.
