د افغاني سرې میاشتې ټولنې د عامه اړیکو رییس غلامحبیب حسن حسام نن سهشنبه د غبرګولي ۲۳مه کابل کې د یوې غونډې پرمهال وویل چې د ملک سلمان خیریه بنسټ افغانستان کې د البصر نړیوال بنسټ له لوري کابل او کندهار کې اړمنو ته د سترګو ناروغیو درملنې زمینه برابروي.
د نوموړي په وینا، دا مهال هغو ۸۰۰۰ ناروغانو ته چې درملو او عینکو ته اړتیا لري، د درملنې زمینه برابره شوې او ۸۰۰۰ ناروغان چې ښه وضعیت کې نه دي، جراحي عملیات به یې وشي.
د سلاموطندار پښتو فېسبوکپاڼه وڅارئ
حسن حسام زیاتوي چې د سترګو څلور زره ناروغان چې درملنې ته اړتیا لري او څلور زره نور چې باید عملیات شي، کابل کې دي او پاتې نور یې کندهار کې دي.
د البصر نړیوال بنسټ عمومي مدیر رضواناحمد بلوڅ وايي چې ښايي دغه پروګرام نورو ولایتونو ته هم وغځول شي.
په ورته مهال یوشمېر هېوادوال چې د سترګو له ناروغۍ ځورېږي، له مرستندویه بنسټونو غوړي چې د افغانستان روغتیا سکټور سره همکاري وکړي.
د کابل اوسېدونکی عبدالمطلب چې د خپلې درملنې لپاره د افغاني سرې میاشتې ټولنې روغتون ته راغلی وايي: «ما خپله درملنه کړې، خو د سترګې د لادرملنې توان مې نه درلود.»
د البصر نړیوال بنسټ مسوولان وايي، ټاکل شوې چې د افغانستان په پنجشېر، هرات او نورو لرو پرتو سیمو کې هم بېوزله افغانانو ته د سترګو ناروغیو د درملنې زمینه برابره کړي.