د هلمند ځایي مسوولان وايي، تېره شپه د دغه ولایت د ناوې ولسوالي په خرابي سيمه کې د اورښتونو له امله د یوه کور چت را لوېدلی او له کبله یې څلورو کسانو خپل ژوند له لاسه ورکړی دی.
د هلمند د والي ویاند مولوي محمدقاسم ریاض وايي، د تېرو درېوو ورځو راهیسې په دغه ولایت پرلهپسې اورښتونه روان دي او تېره شپه په ناوې ولسوالي کې د زیات اورښت له کبله د خرابې په پوټیانو سیمه کې د حاجې سورګل اکا د کورنۍ څلور غړي مړه شوي دي.
په مړو شویو کسانو کې دوه ماشومان، یو نارینه او یوه ښځه شامله ده.
د ریاض په وینا، ښاروالي او د طبیعي پېښو پر وړاندې د مبارزې مسوولانو خلکو ته د سېلابونو راوتلو او ترې د ځان خوندي کولو په اړه د عامه پوهاوي ورکولو لپاره هڅې پیل کړې دي.
هغه له هلمندیانو غواړي چې د اورښتونو او سېلابونو پر مهال له زړو کوټو څخه ووځي او د ځان ژغورنې او خوندیتوب ته پام وکړي.
