د فراه محلي مسوولان وايي چې د دغه ولایت د مرکز په بېلابېلو سیمو کې له پاکستانه راستنېدونکو افغانانو ته د لنډمهالې اوسېدونې لپاره خېمې وهل شوي او کمپ ورته جوړ شوی دی.
د فراه سرې میاشتې ټولنې رییس میراحمد هاشمي سلاموطندار ته ویلي چې له پاکستانه په زرو ایستل کېدونکو کډوالو سره باید ټول هېوادوال همکاري او مرسته وکړي.
د سلاموطندار پښتو فېسبوکپاڼه وڅارئ
نوموړي له سوداګرو او خیریه بنسټونو غوښتنه وکړه چې راغلیو افغانانو سره تر خپله توانه د مرستو رسولو بهیر چټک کړي.
هاشمي زیاته کړه چې دغه ولایت کې جوړ شوي کمپ او لګول شویو هرې خېمه کې ۱۲ کسانو لپاره د اوسېدونې ځای برابر شوی دی.
تېره ورځ د یاد ولایت د والي دفتر له پاکستانه د بېرته راستنېدونکو افغانانو سره د مرستو رسولو لپاره بېړنۍ ناسته هم کړې ده.
د یاد ولایت د والي دفتر څخه په خپره شوې خبرپاڼه کې له پاکستانه په زور د افغانانو د ایستلو پرېکړه غندل شوې او له دغه هېواد څخه د افغان کډوالو د بېرته ستنېدو بهیر د درېدو غوښتنه یې کړې.
پاکستان د روانې نومبر پر دویمه نېټه له دغه هېواد د ناقانونه افغان کډوالو د ایستلو لړۍ پیل کړې چې لا هم روانه ده. په دې لړ کې تراوسه زرګونه کورنۍ له دغه هېواده ایستلو ته اړ شوې دي.
راستانه شوي کډوال د پاکستاني پولیسو له ناوړه چلن شکایت کوي او وايي، ټولنې شتمنۍ یې ورته لوټلي او ناسم چلن یې ورسره کړی دی.