د مارچ ۸مې د ښځو نړیوالې ورځې په رانژدې کېدو سره، ملګروملتونو د (پنجشنبه د کب ۱۶مه) یوه رپوټ کې ویلي، د نړۍ په سطحه د ښځو او نجونو حقونه له بېمخینې ننګونو سره مخ شوي دي.
دغه رپوټ کې راغلي چې ۲۰۲۴ کال کې د ښځو د حقونو په برخه کې د نړۍ یو پر څلورمه برخه دولتونو شاهتګ لرلی دی.
د رپوټ پر اساس، سره له دې چې دغه برخه کې ځینې پرمختګونه شوي، خو د ډیموکراټیکو بنسټونو کمزوري کېدو د جنسیتي نابرابرۍ سره مرسته کړې او د ښځو حقونه اغېزمن شوي دي.
د سلاموطندار پښتو فېسبوکپاڼه وڅارئ
د ملګرو ملتونو په راپور کې راغلي: «په نړیواله کچه د ښځو او نجونو په وړاندې تاوتریخوالی ترخطرناکې کچې لوړ پاتې دی. د نړۍ په هرو دریو ښځو کې یوې په ژوند کې د خپل ژوند د شریک او یا بل کس لخوا فزیکي او یا جنسي تاوتریخوالی تجربه کړی دی.»
همداراز ویل شوي، کله چې ښځې او نجونې وکولای شي پرمختګ وکړي، ورسره ټول پرمختګ کوي.
د ښځو ژوند ارزولو په تړاو د ملګروملتونو په دغه رپوټ کې راغلي چې د نړۍ په سطحه له ۹۰ کم هېوادونه د یوې ښځې د مشرۍ تجربه لري او اړتیا ده چې د ښځو د حقونو ساتنې لپاره بېړني ګامونه پورته شي.
ملګري ملتونه زیاتوي، هڅه کوي چې د نړۍ په سطحه ښځو او نجونو ته داسې شرایط برابر شي، ترڅو له خپلو حقونو او اړینو ازادیو برخمنې شي.
د ښځو اړوند د ملګرو ملتونو راپور کې د جنسیتي نابرابرۍ د ستونزې د حل لپاره د مصنوعي ځیرکتیا په څیر ټکنالوژۍ ته د متوازن لاسرسي، د اقلیم بدلون په وړاندې په فعالیتونو کې د جنسیتي توازن، د بېوزلۍ د ختمولو لپاره د پانګونې، د عامه پوهاوي د زیاتولو او د جنسیتي تاوتریخوالي په خلاف د اقداماتو غوښتنه شوې ده.
