د لوګر لوړو زدهکړو موسسې مسوولان وايي چې یادې پروژې د تېر یوه کال پرمهال د لوړو زدهکړو وزارت د شاوخوا ۶۶ میلیونه افغانیو په ارزښت بشپړې او نن پنجشنبه، لړم درېیمه، ګټېاخیستنې ته وسپارل شوې.
د دغه ولایت د لوړو زدهکړو موسسې رییس مولوي ضیاالاحمدصارم وویل، په بشپړو شویو پروژو کې د لوړو زدهکړو موسسې احاطوي دیوال، عمومي دروازه، څلور حلقې ژورې څاګانې، یو باب معیاري کانټېن، یو باب سایبان، لوړو زدهکړو موسسې ته د برښنا او نوري فایبر وصول کول شامل دي.
د سلاموطندار پښتو فېسبوکپاڼه وڅارئ
نوموړي همدارنګه زیاته کړه، د یادو پروژو له پرانېستې سره اوس د دغه ولایت د لوړو زدهکړو موسسې د ښوونکو او محصلینو ډېری ستونزې هوارې شوې دي.
بلخوا د لوړو زده کړو وزارت سرپرست مولوي ندامحمد ندیم وویل، لوړو زدهکړو وزارت د هیواد په کچه د پوهنتونونو او لوړو زدهکړو موسسو ودانیو او اړتیاوو پورهکولو ته لومړیتوب ورکړی دی.
د ده په وینا، که هر ولایت کې پوهنتونونه او لوړو زدهکړو موسسې معیاري ودانۍ او اسانتیاوې ولري، محصلین به یې په لوړ معیار سره وروزل شي.
د نوموړي په وینا، هڅه کوي چې د لوګر د لوړو زدهکړو موسسې برخه کې شته ستونزو ، ښوونکو او محصیلینو غوښتونو ته رسېدنه وکړي.
باید وویل شي چې د لوړو زدهکړو وزارت سرپرست مولوي ندامحمد ندیم د لوګر د لوړو زدهکړو موسسې له ښوونکو او محصلینو سره هم د هغوی د ستونزو او لاستهراوړنو په تړاو جلا جلا لیدلي دي.