د عامې روغتیا وزارت مسوولان وايي چې د تېرو دوو میاشتو پرمهال هېواد کې د کانګو ناروغۍ مثبتې پېښې ۳۸سلنه زیاتې شوې دي.
د یاد وزارت ویاند شرافتزمان امرخېل نن سهشنبه، غبرګولي ۲۲مه سلاموطندار ته وویل چې تېرو پنځو میاشتو کې د کانګو ۲۰۳ پېښې ثبت شوې وې چې له ډلې یې شپږو کسانو خپل ژوند له لاسه ورکړ.
د سلاموطندار پښتو فېسبوکپاڼه وڅارئ
هغه وویل: «افغانستان کې د تېرو دوو میاشتو پرمهال د کانګو ناروغۍ پېښې ډېرې شوي او ۳۸سلنه زیاتې شوې دي چې تېرو پنځو میاشتو کې ۲۰۳ پېښې ثبت شوي او له امله یې د مړینې شپږ پېښې هم ثبت شوې دي.»
کانګو یوه ویروسي ناروغي ده چې پر دې ناروغي اخته څاروي سره د تماس یا هم د غوښې خوړلو له کبله انسان ته لېږدول کېږي.
په همدې حال کې یوشمېر ډاکټران د دې ناروغي نښې، شدیده تبه، د سر درد، د غړیو درد، د ملا درد، د سترګو سوروالی، ستړیا او ژرغصه کېدل په ګوته کوي.
د انتاني روغتون متخصص فریدالله عمري سلاموطندار ته وویل: «که زموږ پر بدن زخم وي، باید څارویو ته ورنږدې نهشو او کله چې قرباني کوو، دستکشې، ماسک، عینکې او موزې واچوو او له هغې وروسته یې پاکې ومېنځوو.»
د کرنې، اوبولګولو او مالدارۍ وزارت مسوولان وايي چې د کانګو ناروغۍ مخنیوي لپاره یې، هېواد کې د څارویو د دواپاشۍ کمپاین پیل کړی دی.
د یاد وزارت ویاند مصباحالدین مستعین وویل: «د ناروغۍ مخنیوي لپاره هغو ځایونو کې چې د څارویو پلور او پېر کېږي، د عفونت ضد درملو او دواپاشۍ کمپاین پیل کړی او همداراز د دې ناروغۍ په اړه عامه پوهاوی ورکوو.»
د معلوماتو له مخې، تېرکال هېواد کې ۲۴۴کسان پر کانګو ناروغۍ اخته شوي وو چې له امله یې څه باندې ۱۰۰ کسانو خپل ژوند له لاسه ورکړ.