د کابل د امنیې قومنداني ویاند خالد ځدراڼ سلاموطندار ته ویلي، نن چهارشنبه د لړم یوولسمه د کلیو او پراختیا وزارت د کارکوونکو پر موټر د چاودنې له امله د یاد وزارت اته کارکوونکي ټپیان شوي دي.
چاودنه نن سهار د کابل ښار د پنځمې امنیتي حوزې اړوند «کارته مامورین» سیمه کې رامنځته شوې ده.
په دغه پېښه کې د کلیو او پراختیا وزارت د کارکوونکو یو کاسټر ډوله موټر د سړک غاړې ماین چاودنې ښکار ګرځېدلی دی.
د کابل د امنیې قومنداني ویاند خالد ځدراڼ زیاته کړې چې د لومړنیو معلوماتو پر بنسټ، د یادې چاودنې له امله د کلیو او پراختیا وزارت اته کارکوونکي ټپیان شوي دي.
د نوموړي په وینا، د پېښې ټپیان روغتون ته لېږدول شوي او دا مهال تر درملنې لاندې دي. خالد ځدراڼ همداراز ویلي چې امنیتي ځواکونه د پېښې ځای ته رسېدلي او د یادې چاودنې په اړه یې پلټنې پیل کړي دي.
سلاموطندار پر ټویټر هم وڅارئ
تراوسه د یادې چاودنې مسوولیت کوم چا یا ډلې پر غاړه نه دی اخیستی.
